សកម្មភាពនានារបស់ FOUR PAWS អំឡុងពេលការរាតត្បាតជំងឺកូវីត១៩
យើងបន្តប្រយុទ្ធប្រឆាំងដើម្បីបញ្ឈប់ការជួញដូរសាច់ឆ្កែ និងឆ្មាអំឡុងពេលមានជំងឺរាតត្បាត
វិបត្តិជំងឺកូវីត១៩ បានជះឥទ្ធិពលប៉ះពាល់ដល់ជីវិតមនុស្សរាប់ពាន់លាននាក់ទូទាំងពិភពលោករួមទាំងសត្វផង។ ដើម្បីទប់ស្កាត់ជំងឺរាតត្បាតដ៏ខ្លាំងក្លាមួយទៀតដែលកើតឡើងបន្ទាប់ អង្គការ FOUR PAWS បានបញ្ចុះបញ្ចូលរដ្ឋាភិបាលនានាឱ្យមានការផ្លាស់ប្ដូរ ក្នុងគោលបំណងបញ្ឈប់ការជួញដូរសាច់ឆ្កែ និងឆ្មាធ្វើឱ្យស្ថានភាពល្អប្រសើរឡើង។ ក្រុមការងារយើងក៏បានចុះធ្វើការផ្ទាល់ជាមួយដៃគូក្នុងស្រុក អនុវត្តនូវកម្មវិធីចិញ្ចឹមថែទាំនានា ដើម្បីធានាថាសត្វទាំងអស់ទទួលបានការថែទាំដែលពួកវាត្រូវការអំឡុងពេលវេលាដ៏លំបាកដែលមិនធ្លាប់មានពីមុននេះ និងចៀសវាងធ្លាក់ទៅក្នុងដៃអ្នកជួញដូរសាច់ឆ្កែ។ ក្រុមការងារយើង ក៏បាន និងកំពុងបន្តការស៊ើបអង្កេតនានាដើម្បីរកឱ្យឃើញថាស្ថានភាពជំងឺកូវីត១៩ បានជះឥទ្ធិពលប៉ះពាល់ដល់ការជួញដូរសាច់ឆ្កែ និងឆ្មា ឬយ៉ាងណា។
ក្នុងកិច្ចខិតខំប្រឹងប្រែងលើកទឹកចិត្តរដ្ឋាភិបាល និងក្រុមហ៊ុននានា ឱ្យជំរុញវិធានការបន្ទាន់ប្រឆាំងនឹងការជួញដូរ អង្គការ
FOUR PAWS មានវិធានការមួយចំនួនដូចខាងក្រោម៖
ឥណ្ឌូណេស៊ី
ក្នុងនាមជាផ្នែកមួយនៃសម្ព័ន្ធគ្មានសាច់ឆ្កែឥណ្ឌូណេស៊ី យើងបានផ្ញើលិខិតមួយទៅកាន់ប្រធានាធិបតីឥណ្ឌូណេស៊ី លោក Joko Widodo ដើម្បីស្នើសុំរដ្ឋាភិបាលឥណ្ឌូណេស៊ីបញ្ឈប់ការជួញដូរសាច់ឆ្កែឆ្មា និងសត្វព្រៃនានា ដោយសារមើលឃើញពីហានិភ័យប្រឈមចំពោះសុខភាពមនុស្ស និងសត្វ ក៏ដូចជាហានិភ័យបង្កដោយវីរុសថ្មីៗផងដែរ។
យើងបានចេញរបាយការណ៍ដំបូងបង្អស់ស្ដីពីការជួញដូរសាច់ឆ្កែ និងឆ្មានៅអាស៊ីអាគ្នេយ៍
យើងបានចេញរបាយការណ៍មួយដំបូងបង្អស់ស្ដីពីការជួញដូរសាច់ឆ្កែ និងឆ្មានៅអាស៊ីអាគ្នេយ៍ ជាភាសាអង់គ្លេស អាល្លឺម៉ង់ វៀតណាម និងខ្មែរ ដើម្បីទាញចំណាប់អារម្មណ៍អំពីទំហំ ទង្វើខុសច្បាប់ និងហានិភ័យសុខភាពដែលបណ្ដាលមកពីការជួញដូរសាច់ឆ្កែ និងឆ្មា។
កម្ពុជា
ជាមួយដៃគូអង្គការសង្គ្រោះសត្វកម្ពុជា យើងបានផ្ញើលិខិតមួយទៅកាន់ក្រសួងកសិកម្មនៃព្រះរាជាណាចក្រកម្ពុជា ដោយបានគូសបញ្ជាក់ពីហានិភ័យបណ្ដាលមកពីការជួញដូរនេះ និងជំរុញឱ្យមានការចាត់វិធានការបន្ទាន់។
វៀតណាម
យើងបានផ្ញើលិខិតមួយជូនគណៈកម្មាធិការប្រជាជនទីក្រុងហាណូយ ដោយគូសបញ្ជាក់ពីហានិភ័យចំពោះសុខភាពបណ្ដាលមកពីការជួញដូរសាច់ឆ្កែ និងឆ្មា។ កិច្ចការងារនេះ សម្រេចទៅបានក្រោមកិច្ចសហការជាមួយដៃគូយើងនៅវៀតណាមគឺ Paws for Compassion and Vietnam Cat Welfare ក៏ដូចជាដៃគូអន្តរជាតិ Change for Animals Foundation ផងដែរ។.
អឺរ៉ុប
ក្រោមកិច្ចសហប្រតិបត្តិការរួមជាមួយ Compassion in World Farming និង World Animal Protection យើងបានផ្ញើលិខិតចំហមួយទៅកាន់សហភាពអឺរ៉ុប ដើម្បីស្នើសុំឱ្យចាត់វិធានការទប់ស្កាត់ការលេចចេញនូវជំងឺស្រដៀងនឹងកូវីត១៩នាអនាគត ព្រមទាំងស្នើសុំឱ្យចូលរួមគាំទ្រការហាមឃាត់ទីផ្សារសត្វរស់ដែលជាកន្លែងលក់សត្វព្រៃ ឆ្មា និងឆ្កែជាដើម។
កម្ពុជា
ជាមួយដៃគូអង្គការសង្គ្រោះសត្វកម្ពុជា យើងបានដាក់លិខិតមួយជូនក្រសួងសុខាភិបាលនៃព្រះរាជាណាចក្រកម្ពុជា ដើម្បីបង្កើនការប្រុងប្រយ័ត្នចំពោះគ្រោះថ្នាក់ដែលបង្កឡើងដោយសារការទទួលទានសាច់ឆ្កែ និងឆ្មា ព្រមទាំងបានគូសបញ្ជាក់ពីក្ដីកង្វល់ចំពោះមនុស្សមួយចំនួនដែលបានបរិភោគសាច់ទាំងនេះដោយជំនឿភាន់ច្រឡំថាវាអាចជួយ “ការពារ” ពួកគេពីជំងឺកូវីត១៩បាន។
វៀតណាម
ជាមួយអង្គការដៃគូយើងនៅ Asia Canine Protection Alliance យើងបានសរសេរលិខិតមួយជូនប្រធានគណៈកម្មាធិការប្រជាជនទីក្រុងហាណូយ ដើម្បីស្នើសុំឱ្យលោកអនុវត្តគោលដៅដែលបានដាក់ចេញដើម្បីបញ្ឈប់ការជួញដូរសាច់ឆ្កែ និងឆ្មា ព្រមទាំងណែនាំច្បាប់ហាមឃាត់ថ្មីមួយ។
អាស៊ី
អង្គការ FOUR PAWS បានចេញផ្សាយអត្ថបទជាអន្តរជាតិមួយអំពីការលក់ដូរសាច់ឆ្កែ និងឆ្មាដែលកំពុងបន្តនៅអាស៊ីអាគ្នេយ៍ ទោះបីមានការហាមឃាត់ចំពោះការជួញដូរនេះនៅតាមតំបន់នានាក៏ដោយ រួមទាំងទីក្រុង Shenzhen ប្រទេសចិនជាដើម។
កម្ពុជា និង វៀតណាម
លិខិតចំហត្រូវបានផ្ញើជូននាយករដ្ឋមន្ត្រីនៃព្រះរាជាណាចក្រកម្ពុជា និងឧបនាយករដ្ឋមន្ត្រីវៀតណាមតាមរយៈអង្គការ Asia for Animals Coalition និង Asia Canine Protection Alliance ដើម្បីស្នើសុំឱ្យរដ្ឋាភិបាលនៃប្រទេសទាំងពីរជំរុញនីតិវិធីបញ្ឈប់ការជួញដូរសាច់ឆ្កែ និងឆ្មា។
កម្ពុជា និង វៀតណាម
យុទ្ធនាការថ្មីមួយស្ដីពីហានិភ័យបណ្ដាលមកពីការជួញដូរសាច់ឆ្កែ និងឆ្មា នៅកម្ពុជា និងវៀតណាម បានដំណើរការអនុវត្ត។ គោលបំណងនៃយុទ្ធនាការនេះ គឺដើម្បីបង្កើនការយល់ដឹងជាសាធារណៈអំពីហានិភ័យនានាដែលបង្កឡើងតាមរយៈការជួញដូរដែលមានឥទ្ធិពលជាប្រភពបង្កជំងឺរាតត្បាតថ្មីបន្ទាប់ទៀត។
